最近個個都講移民，等我又湊下熱鬧，分享自己嘅少少經驗。
老實講，要去一個新嘅國家生活真係唔係易事。我記得四年前因為Working Holiday而第一次踏足澳洲，當時係九月中，澳洲仍然好凍，又大風又落雨，即使著晒羽絨同Heattech都頂唔順。
加上嗰陣自己無車，出入都係以火車同巴士代步，去一個目的地，落車之後，輕則行三、四個字，重則行八、九個字，一來一回齋咁樣行已經用咗一個鐘，如果你當日係出去買餸，拎住一袋二袋再咁行，都真係幾辛苦。
而且我當時係住share house，六、七個人住一間屋，要輪厠所輪煮飯，個個住客嘅生活習慣、衛生程度都唔同，少啲包容都唔掂。
咁當然而家講得移民嘅人可能已經有一定嘅經濟基礎，唔止有能力買車，仲可以買樓，就算唔買樓，都起碼可以整租，唔駛同人share，所以如果以上問題都KO咗嘅話，我恭喜你，起碼你已經有一條易行少少嘅路，但隨之而嚟要解決嘅，就係心態。
要記住去到一個新嘅國家，嗰度唔係香港，唔係隨時落街都買到你要嘅嘢，唔係周圍都搵到檸茶奶茶飲，唔係病咗就即刻搵到醫生睇。每個地方都有自己嘅生活模式，係需要時間去適應，唔好將香港嗰套搬落人地度。
好多人都會覺得澳洲好悶，因為呢度啲舖頭下晝五、六點就關，公眾假期又唔開，想行下街都唔得，但冷靜啲諗下，作為一個打工仔，我都想五、六點收工，之後可以返屋企同家人食飯，星期日陪下媽咪飲茶，咁其他人都係人，都有家人朋友，都會想有自己時間放鬆下，咁先係work life balance。
我而家講嘅心態都只係最表面嗰一層，都仲未講搵工，當中嘅不安、迷惘留返下次再分享，唔係寫咁長，大家冇心機睇。
#人在異鄉的日子 #拎住workingvisa嘅小薯
Search